Abror Zufarov
Zufarov Abror Maxamad-Sodiqovich (1971-yil 22-fevral, Toshkent) — o‘zbek tanburchisi, maqom ijrochisi, pedagog va tadqiqotchi.
Abror Zufarov | |
|---|---|
| Kasbi | Tanburchi, maqom ijrochisi, pedagog, tadqiqotchi |
| Faoliyat yillari | 1990-yillardan hozirgacha |
| Millati | o‘zbek |
U san’atkorlar sulolasiga mansub bo‘lib, ota tomondan mashhur sozgar usta Usmon Zufarov, onatomondan esa maqom ustasi Turg‘un Alimatovlar avlodidan hisoblanadi. Otasi Muhammad-Sodiq Zufarov ham sozgar usta bo‘lgan.
Hayoti va ta’limi
Abror Zufarov Toshkent shahrining Uchtepa tumanida voyaga yetgan. Musiqaga bo‘lgan qiziqishi oilaviy muhit ta’sirida erta shakllangan. Uning ilk ustozlaridan biri bobosi — Turg‘un Alimatov bo‘lgan.
1989–1991-yillarda Toshkent davlat konservatoriyasining tayyorlov kurslarida tahsil olgan. 1991–1996-yillarda Toshkent davlat konservatoriyasida „An’anaviy ijrochilik“ yo‘nalishi bo‘yicha tanbur mutaxassisligini egallagan. Ta’lim jarayonida Turg‘un Alimatov, Fattohxon Mamadaliyev, Hasan Rajabiy, Abdurahim Hamidov kabi ustozlardan saboq olgan.
Ijodiy faoliyati
Abror Zufarovning sahna faoliyati 1990-yillarning boshlarida boshlangan. 2000-yilda „Moziy“ sozandalar ansambliga asos solgan. 1998-yilda „Asrlar sadosi“ respublika ko‘rik-tanlovida II o‘rinni qo‘lga kiritgan.
U asosan maqom va xalq musiqasi yo‘nalishlarida ijod qiladi. Uning repertuaridan „Sarahbori Dugoh“, „Sarahbori Navo“, „Bayot“, „Segoh“, „Tanovar“, „Toshkent irog‘i“, „Chorgoh“ kabi asarlar o‘rin olgan.
Pedagogik va ilmiy faoliyati
Abror Zufarov pedagogik faoliyatini talabalik yillaridan boshlagan. O‘zbekiston davlat konservatoriyasi, Hamza nomidagi litsey hamda madaniyat va ma’rifat muassasalarida dars bergan.
U 10 dan ortiq ilmiy maqola, o‘quv qo‘llanma, darslik, monografiya va avtoreferat muallifi. Tanbur cholg‘usi uchun maxsus nota va o‘quv qo‘llanmalar yaratgan. Oʻzbekiston milliy teleradiokompaniyasining oltin fondida uning audio va video yozuvlari saqlanadi.
Havolalar
https://www.womex.com/virtual/oxus_culture/abror_zufarov https://podrobno.uz/cat/obchestvo/instrumentalist-virtuoz-iz-uzbekistana-abror-zufarov-vystupil-v-venetsii/ http://www.classicmusic.uz/Abror.htm