Budjet ssudasi

Budjet ssudasi – yuqori byudjetdan quyi byudjetga yoxud respublika byudjetidan rezident – yuridik shaxsga yoki chet el davlatiga qaytarish sharti bilan ajratiladigan mablagʻ („Byudjet tizimi toʻgʻrisida“ gi Oʻzbekiston Respublikasi Qonunining 3-moddasi).  Budjet ssudasi kechiktirib boʻlmaydigan birinchi navbatdagi tadbirlarni moliyalashtirishni taʼminlash uchun beriladi . Ular : a) daromadlar tushumlari bilan xarajatlarni amalga oshirish oʻrtasidagi rejali vaqtincha uzilishlarini qoplash uchun; b) daromadlar tushumlari bilan xarajatlarni amalga oshirish oʻrtasidagi amaldagi vaqtinchalik kassa uzilishlarini qoplash uchun; v) QR byudjeti va mahalliy byudjetlar rejali xarajatlarini maqsadli moliyalashtirish sxemalarini amalga oshirish uchun ajratiladi . Ssudalar joylardagi hokimiyat ijroiya organlari rahbarlarining yozma murojaati boʻyicha beriladi. Ular QR Vazirlar Kengashi, viloyat hokimlari va Toshkent shahri Hokimi tomonidan Oʻzbekiston Respublikasi Moliya vazirligiga joʻnatiladi, tumanlar va shahar hokimlari esa yuqori hokimiyat organlariga yuboradi. Byudjetga daromadlar kelib tushmagan yoki byudjet xarajatlarini oldindan moliyalashtirish zarurati tugʻilgan holatlar hamda qabul qilingan choralar tegishli byudjet daromadlari va xarajatlari muvozanatini taʼminlamagan sharoitlar ssuda berilishi uchun murojaatga asos boʻlib xizmat qilishi mumkin.