Julia Child
Julia Carolyn Child (qizlik familiyasi: McWilliams[1]; 1912-yil 15-avgust — 2004-yil 13-avgust) — amerikalik oshpaz, muallif va televideniye shaxsi. U oʻzining „Fransuz pazandachilik sanʼatini egallash“ (Mastering the Art of French Cooking) nomli debyut oshpazlik kitobi va 1963-yildan namoyish etila boshlangan „Fransuz oshpazi“ (The French Chef) kabi mashhur koʻrsatuvlari orqali fransuz oshxonasini Amerika xalqiga tanishtirgan shaxs sifatida eʼtirof etiladi.
| Julia Child | |
|---|---|
| Julia Carolyn McWilliams | |
 Julia Child oʻz oshxonasida, 1978-yil | |
| Tavalludi |
15-avgust 1912-yil |
| Vafoti |
13-avgust 2004-yil (91 yoshda) Montecito, Kaliforniya, AQSH |
| Fuqaroligi | AQSH |
| Taʼlimi | Smith College, Le Cordon Bleu |
| Kasbi | Oshpaz, yozuvchi, teleboshlovchi |
| Faoliyat yillari | 1935–2004 |
| Mashhur ishlari | Mastering the Art of French Cooking |
| Boʻyi | 1.88 m |
| Turmush oʻrtogʻi | Paul Cushing Child (1946–1994) |
| Bolalari | Yoʻq |
| Otasi | John McWilliams Jr. |
| Onasi | Julia Carolyn Weston |
| Mukofotlari | Prezidentlik ozodlik medali, Emmi mukofoti, Peabody mukofoti |
| Imzosi | |
 | |
Yoshligi va taʼlimi
Julia Kaliforniyaning Pasadena shahrida tugʻilgan. Uning otasi John McWilliams Jr. Prinston universiteti bitiruvchisi, onasi Julia Carolyn Weston esa qogʻoz ishlab chiqaruvchi kompaniya merosxoʻri edi[2]. U 1934-yilda Smith kollejini tarix mutaxassisligi boʻyicha tamomlagan[1]. Yoshligida u tennis, golf va basketbol bilan faol shugʻullangan.
Ikkinchi jahon urushi davri
Julia Child 1942-yilda Strategik xizmatlar boshqarmasiga (OSS) qoʻshildi[3][4]. Uning boʻyi 1.88 metr boʻlgani sababli, uni Harbiy-dengiz flotiga qabul qilishmagan. Julia OSSda maxfiy tadqiqotchi boʻlib ishladi va akulalarni haydaydigan maxsus vosita („shark repellent“) yaratish ustida tajribalar oʻtkazdi[3][4]. Bu vosita portlovchi moddalarni akulalar urib yubormasligi uchun kerak edi. Xizmat davomida u Seylon (Srilanka) va Xitoyda boʻlib, u yerda boʻlajak turmush oʻrtogʻi Paul Child bilan tanishdi.
Pazandachilikdagi faoliyati
1948-yilda Julia turmush oʻrtogʻi bilan Parijga koʻchib oʻtdi. Aynan shu yerda u fransuz oshxonasiga mehr qoʻydi. 1951-yilda u mashhur „Le Cordon Bleu“ pazandachilik maktabini tamomladi. Keyinchalik u Simone Beck va Louisette Bertholle bilan birgalikda amerikaliklar uchun fransuz oshpazlik kitobini yozishga kirishdi. Ularning 1961-yilda nashr etilgan „Fransuz pazandachilik sanʼatini egallash“ kitobi katta muvaffaqiyat qozondi.
Julia Childning televideniyedagi debyuti 1963-yilda „Fransuz oshpazi“ koʻrsatuvi bilan boshlandi. Uning quvnoq feʼl-atvori, oʻziga xos ovozi va xatolardan qoʻrqmay taom tayyorlashi tomoshabinlarga manzur boʻldi. U ushbu koʻrsatuvi uchun Peabody va Emmi mukofotlarini qoʻlga kiritdi.
Vafoti va merosi
Julia Child 2004-yil 13-avgustda, 92 yoshga toʻlishidan ikki kun oldin buyrak yetishmovchiligidan vafot etdi. U oʻzining soʻnggi „My Life in France“ kitobini „…stol va hayot zavqlari cheksizdir — toujours bon appétit!“ degan soʻzlar bilan yakunlagan. Uning Kembridjdagi oshxonasi hozirda Vashingtondagi Milliy Amerika tarixi muzeyida saqlanmoqda. 1995-yilda u pazandachilik sanʼatini rivojlantirish maqsadida „The Julia Child Foundation for Gastronomy and the Culinary Arts“ jamgʻarmasiga asos soldi.
Manbalar
- ↑ 1,0 1,1 Michael Rosen (interviewer). Julia Child – Archive Interview, part 1 of 6 [video]. Archive of American Television.
- ↑ Scauzillo, Steve. „Such a Shame: Julia Child's family home, now owned by Caltrans, is vacant, deteriorating in Pasadena“ (2018-yil 11-mart). Qaraldi: 2019-yil 5-dekabr.
- ↑ 3,0 3,1 Julia Child’s Spy Days Included Work on a Shark Repellent. The History Channel. Retrieved June 3, 2021.
- ↑ 4,0 4,1 „Julia Child Helped Develop Shark Repellant During World War II“. The National WWII Museum via Internet Archive. Retrieved June 3, 2021.