Nikolay Karaxan

Nikolay Grigoryevich Karaxan (1900.17.5, Togʻli Qorabogʻ muxtor viloyati – 1970.18.6, Toshkent) – Oʻzbekiston SSR xalq rassomi (1950). 1908-yildan Oʻzbekistonda. Turkiston oʻlka rassomlik maktabida taʼlim olgan (1918—1921). Toshkent rassomlik bilim yurtida dars bergan (1925—1941). Karaxan asarlarida oʻzbek xalqining hayoti va mehnatini, tabiat manzaralarini rangli lavhalarda aks ettirgan: „Oʻroqchilarning ishdan qaytishi“ (1927), „Sirdaryo sohilidagi bozor“ (1929), „Gʻalla oʻrimi“ (1930), „Buxoroda qurilish“ (1933), „Ishga ketishyapti“ (1934), „Ovqatlanish mahali“ (1935) va boshqalar. 1930-yillarning oxirlaridan asarlarida respublika manzaralarini aks ettira boshladi, kishilarni ham manzaralar fonida tasvirladi („Ayollar gʻallazorda“, 1936; „Gʻalla elayotgan ayol“, 1946; „Nanay yoʻli“, 1954; „Oltin kuz“, 1957; „Yashnayotgan vodiy“, 1958; „Oltin simfoniya“, 1965; „Soʻnggi nur“, 1969 va boshqalar). Koʻpgina rassomlar (jumladan, R.Ahmedov, Z.Inogʻomov va boshqalar) Karaxanning shogirdlaridir. Karaxan asarlari respublika va chet mamlakatlar muzeylari va xususiy toʻplamlarda saqlanadi.