Fara

Фара (франс. пҳаре – маёқ, маёқ чироғи) – транспорт воситаси (автомобил, трактор ва бошқалар) ҳамда ўзиюрар машиналарнинг йўлни, иш бажарилаётган жой ва бошқаларни ёритиш учун мўлжалланган электр асбоби. Асосий қисмлари – штамплаб ясалган корпус ва оптик элементлар. Оптик элемент юпқа алюминий қатлами суркалган пўлат қайтаргич, бир ёки икки толали чўғланма лампадан иборат ёритиш манбаи ва ёруғликни сочиб берадиган ғадир-будир шишадан иборат. Ёруғлик қайтаргич фокусида жойлашган қувватлироқ толадан тарқаладиган нур узоқни ёритади, кичикроқ қувватли иккинчи тола фокусдан юқорироқда чап томонда жойлашган бўлиб, яқинни ёритиш учун мўлжалланади. Ёд лампали фаралар кенг тарқалган. Бундай лампаларнинг колбасига ёд буғлари бўлган сийраклаштирилган газ тўлдирилади. Ҳар бир транспорт воситасига камида бир жуфт фаралар ўрнатилади. Улар машинанинг бўйлама ўқига нисбатан симметрик тарзда жойлаштирилади. Баъзи машиналарда туманга қарши иккита қўшимча фаралар ҳам ўрнатилиши мумкин. Махсус машиналар (ўт ўчириш машиналари, санитария машиналари ва бошқалар) га буриладиган Ф.лар ҳам ўрнатилади. Баъзан фаралар машина орқасига ҳам ўрнатилади (масалан, тракторларда тиркамани ёки плугни ёритиш учун шундай қилинади).