Modulyatsiya

Модулясия (лотинча: модулатио — бир текислилик) — 1) физика ва радиотехникада — бирор ўзгармас физик жараённи ифодаловчи катталикнинг муайян қонун бўйича ўзгариши. Модулясия ташқи таъсир ёрдамида амалга оширилади.

Электроникада кўпгина электрон асбобларнинг иши электрон оқимларини модулясиялашга асосланган. Масалан, кинескопларда экранга узатилувчи телевизион шаклларни ҳосил қилувчи электрон нури интенсивлиги модулясияланади. Кли-стронларда электрон оқимининг тезлиги бўйича М.лаш оқимда электронларни гуруҳлашга олиб келади. Бу эса, ўз навбатида, гуруҳлашган электронлар кинетик энергиясини ўта юқори частотали тебранишлар энергиясига айлантирилишига олиб келади. Радио- ва оптик диапазонларда электромагнит тебранишларнинг ҳамда акустик тўлқинларнинг М.лари катта амалий аҳамиятга эга. Маълумотлар узатиш самарадорлигини ошириш, турли тизим ва қурилмаларда частота тақсимотини таъминлаш, сигналларнинг вақтга боғлиқ параметрларини ўлчаш учун техник қурилма ва тизимларда тебранишлар М.си зарур ҳисобланади. М.жараёнида тебранишнинг ўзгарадиган параметрлари (частотаси, амплитудаси, фазаси)га қараб унинг номланиши белгиланади (частотали, амплитудали, фазали М.).

Кўпинча, М.ланган сигнал импулс тарзида, натижаси эса юқори частотали импулелар тўплами ёки радиоимпулс кўринишда бўлади. Ҳозирги пайтда тўрт турдаги импулели М мавжуд: амплитуда-импулели, частота-импулели, фазавий-импулели ва кенглик-импулели М. Импулели М. узлуксиз гармоник тебранишли М.га караганда шовқинга нисбатан кучайтирилган таянчга эгалиги билан ажралади;

2) ёруғлик техникасида — ёруғлик нури ёрқинлигини ёки ёруғ доғ ўлчамини келаётган сигналларга мувофиқ равишда ўзгартириш; овозни оптик усулда ёзиб олиш, фототелеграф ва бошқа соҳаларда қўлланади.